Молитва святителю Афанасию, епископу Ковровскому, исповеднику и песнописцу

Дни памяти: 29 января (новомуч.), 15 октября

Молитва

О, многострадальне и благоглаголиве святителю и исповедниче Христов Афанасие, пастырю добрый пажитей Церкве Русския, Православия ревнителю, покаяния проповедниче, молитвы столпе, любве неиссякаемый источниче, цевнице богодухновенная!
Ты, землею древнею и святою воспитанный, измлада сосуд избранный Богу явился еси, ревностно служа Ему словесы и делы, молитвою теплою, постом неослабным, милостынею нелицемерной. Службе Божией зело прилежа, талант песнотворчества усердно умножил еси и многими духоносными пении Церковь Русскую украсил еси, наипаче же потрудился в прославлении святых земли Русския, ихже пред кончиною купно с Господом зрети сподобился еси.
Истины ради и кротости и правды достойно помаза тя во святители Владимирский благодать Святаго Духа, еюже просвещен, проповедал еси Православия предания неуклонно посреде безбожных гонителей. Аще и в заточениих, изгнаниях и горьких работах тридцать лет пробыл еси, поношения, озлобления и раны за Христа сладце претерпевая, ты, священное исповедание яко забрало восприим, богохульные дерзновенно обличил еси и безплотные враги посрамил еси, паству свою делы паче слов поучая, яко Богу подобает повиноватися паче человек. Темже блаженства изгнанных правды ради сподобився и Престолу Небесному предстоя, моли Всеблагаго Бога нашего, да утвердит Церковь Русскую, ее пастырей непозыблемы в истинах веры, от ересей и расколов, да пребудут чада ея тверды во исповедании святаго Православия, претерпевая все напасти времени, прославляя единым сердцем и едиными усты дивного во святых Своих Бога, Отца и Сына и Святаго Духа, во веки веков. Аминь.

Афанасий (Сахаров), епископ Ковровский, новомученик (1887-†1962г.)
Акафист святителю Афанасию, епископу Ковровскому, исповеднику и песнописцу
Тропарь святителю Афанасию, епископу Ковровскому, исповеднику и песнописцу