Молитва святым священномучеником Онуфрию, Александру и Константину со новомученики земли Слободския, за имя Божие и Церковь Православную пострадавшим.

Дни памяти: 1 июня (19 мая), 24(11) мая, 12 ноября (30 октября)

О многострадальне священномучениче и верный исповедниче Христов Онуфрие! Имея веру адамантову и любовь серафимскую ко Господу, и ревность ко Храму Божию Давидову, попечение же Павлово о благостоянии Церкви Христовой, вся беды и скорби, гонение и поношение, и узы темничнии всеусерднейше понесл еси, всеблаженне.

Ныне же, со всеми страстотерпцы земли Слободския, славно пострадавших и веру православную соблюдших, принеси молитву сердечную за нас ко всех Владыце, якоже иногда за соузников своих темничных молился еси, егда за Имя Божие и веру святую православную истребляху их, да милосердствуя, оградит Господь Свою Святую Церковь и нас от злобы и лукавства сынов беззаконных, жаждущих крови нашея, от них же сам гоним был еси и лютую смерть претерпел преславно. Сии бо духом ада предводимы, храмы святыя и алтари их разоряюще и Имя Божие хуляще, овы же ересьми и расколы, иные клеветою и лжепрорицаниями, и чудесе ложными, насаждая пагубныя сборища свои, яко же волки хищнии, устремишася чад Церкви Православныя поглотити и погубити.

Сего ради молим вас прилежно, святителие Христовы Онуфрие, Александре и Константине, священнодействовавших пред Лицем Божиим кровию своею и добродетельми новомучеников земли нашея возвеличившими Пресвятое Имя Его, молитися, да не погубит нас Господь грех ради наших и не предаст души наша в руки ангелов лютых. Да не поядет огонь юноши наша и девы не неосетованы будут, священницы же наша да не падут от меча лютаго, и вдовицы не оплаканы явятся, нас же в поношение и посрамление вечного пленения да не предаст Господь.

Вы же, предстателие наша теплейшии, помяните нашу немощь, укрепите нас в любве вашей ко Господу и в мужественном стоянии, даже до крове за святую веру православную, и умолите Владыку мира, даровати нам и грядущим по нас мир и благоденствие, благорастворение воздухов и умножение плодов земных; от глада, труса, огня и междоусобныя брани, от всяких бед и напастей нас избавити, да непостыдно совершим хождение наше пред Лицем Божиим.

Церкве же Святей, Православней благостояние и утверждение да дарует Господь, народу нашему и правителем его мудрость, согласие и страх Божий, союзом любви Христовой утверждаемый, нам же единомыслие веры, во еже утвердитися в любви и согласии, исполняюще волю Божию и его святые запо-веди с благоговением и отрадою.

Да тако прославляется в делах наших Имя Божие от рода в род и во веки.
Аминь!

Александр (Петровский), архиепископ Харьковский, священномученик (1851-1940гг.)
Акафист священномучеником Онуфрию, Александру и Константину со новомученики земли Слободской