Молитвы праведному Симеону Богоприимцу
Дни памяти: 15 (2) февраля, 16 (3) февраля
Молитва 1-я
О, великий угодниче Божий и Богоприимче Симеоне!
Призри на мя грешнаго, ко святей иконе твоей припадающа и просяща твоего заступления и помощи: скорбь бо обдержит мя от обстоящих мя ныне бед и зол, и утешения не имам многоболезненней души моей.
Исках помощи от человек, и не обретеся. Возопиях ко Господу, и не услыша мя: аз прогневах пречистую благость Его беззакониями моими и множеством многих грехов моих преогорчих человеколюбную утробу Его.
И кто ми ныне помощь явит? Кто ми скорбь утолит? Кто даст отраду и успокоение многомятежней душе моей?
К тебе, великий угодниче Божий, прибегаю грешный и недостойный аз, ведый, яко велие дерзновение имаши ко Христу Богу и многомощен предстатель еси о всех, с верою к тебе прибегающих и твоего заступления и помощи требующих.
Моли убо Человеколюбца Господа, яко да простив ми безчисленная моя прегрешения, не отвратит милость Свою от мене, но яко благ и сострадателен, явит и мне безконечное Свое милосердие, и в лютем напастей и бед моих озлоблении подаст ми всесильную помощь Свою, и преогорченной душе моей ослабу, мир, укрепление, утешение и успокоение дарует.
Ей, великий угодниче Божий, вознеси Богоносныя руце твоя ко Иже во объятиях твоих носитися изволившему Христу Богу нашему и моли благость Его, да не отринет моления сердца моего недостоинства ради моего, но явит мне благовременне милость Свою, во славу безконечных щедрот Своих и многомощнаго предстательства твоего.
О немже подобает Ему всякая слава и благодарение купно со Отцем и Пресвятым Его Духом ныне и присно и во веки веков.
Аминь.
Молитва 2-я
О, великий угодниче Божий Богоприимче Симеоне!
Предстоя Престолу Великаго Царя и Бога нашего Иисуса Христа, велие дерзновение имаши к Нему, во объятиях твоих нашего ради спасения носитися изволившему.
К тебе убо, яко многомощному предстателю и крепкому о нас молитвеннику, прибегаем мы, грешнии и недостойнии.
Моли Благость Его, яко да отвратит от нас гнев Свой, праведно по делом нашим на ны движимый, и, презрев безчисленная прегрешения наша, обратит нас на путь покаяния и на стезе заповедей Своих утвердит нас.
Огради молитвами твоими в мире живот наш и во всем благом благое поспешение испроси, вся яже к животу и благочестию потребная нам даруя.
Якоже древле Великий Новград явлением чудотворныя иконы твоея от губительства смертнаго избавил еси, тако и ныне нас и вся грады и веси страны нашея от всяких напастей и бед и напрасныя смерти предстательством твоим избави, и от всех враг видимых и невидимых покровом твоим защити.
Яко да тихое и безмолвное житие поживем во всяком благочестии и чистоте и, тако в мире временное сие житие прешедше, в вечный достигнем покой, идеже сподобимся Небеснаго Царствия Христа Бога нашего.
Ему же всякая слава подобает со Отцем и Пресвятым Его Духом ныне и присно и во веки веков.
Аминь.
Симеон Богоприимец, праведный
Житие праведного Симеона Богопримца
Акафист праведному Симеону Богоприимцу
Мы будем благодарны, принять от Вас любую помощь. Все собранные пожертвования пойдут на содержание общины и создание православно-культурного центра в Баден-Бадене.
Банковские счета для Ваших пожертвований*:
Bank Kontos für Ihre Spenden*:
Deutsche Bank
DE02 6627 0024 0039 1888 00
Volksbank Baden-Baden
DE68 6629 0000 0036 7984 08
*Квитанция о пожертвовании для налоговой инспекции по запросу
*Spendenquittung für
Finanzamt
auf Anfrage
