Акафист блаженной царице Феофании

День памяти: 29 декабря

/pages/29130779

/pages/30310401?atlOrigin=eyJpIjoiOWNkNTVlYjI2MzFkNDZiZTkyMzI4NWU1ZDJkNDEzZTciLCJwIjoiYyJ9

/pages/30310408?atlOrigin=eyJpIjoiOGFmNjYxNjEyYTJkNGEzM2JjZWRhNzM2NDkxYmE0MzIiLCJwIjoiYyJ9

/pages/29261846?atlOrigin=eyJpIjoiMDM0OGFmNjI2NDQ2NDM3NzlkMDk2NTBkOTA5ODgyY2UiLCJwIjoiYyJ9

Кондак 1

Избра́нней и преди́вней уго́днице Бо́жией блаже́нней цари́це Феофа́нии пе́ние похва́льное прино́сим во вселе́тней па́мяти ея́, и, я́ко иму́щей дерзнове́ние ко Го́споду, взыва́ем: испроси́ у Царя́ Ца́рствующих Христа́, да моли́твами твои́ми соприча́стницы Собо́ра всех святы́х бу́дем, умиле́нно пою́ще ти: 

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.                                                                                                                                                    

Икос 1

А́нгелы в помо́щники себе́ призыва́ша боголюби́вый иллю́стрий Константи́н с благоче́стною супру́гою А́нною, Бо́га о дарова́нии ча́да приле́жно умоля́я, Богоро́дицу и Ма́терь Све́та о разреше́нии безпло́дия хода́тайства прося́, во хра́ме Ея́ всечестне́м в Фора́кии: «Да разреши́тся, о Госпожа́ ми́ра, безпло́дие на́ше Твои́м милосе́рдием, и да прии́мем по хода́тайству Твоему́ от Созда́теля чадоро́дие!» Ми́лости Боже́ственныя дар бы́сть дще́рь Феофа́ния блаже́нная, моли́твенница о христиа́нах правосла́вных, е́й же ра́достно пое́м такова́я: 

Ра́дуйся, пло́де моли́твы Бо́гом дарова́нный.

Ра́дуйся, я́ко роди́телей рожде́нием твои́м Бог возвесели́вый.

Ра́дуйся, я́ко в младе́нчестве крести́ти тя Госпо́дь их умудри́вый.

Ра́дуйся, я́ко отрокови́цею ко Христу́ после́довавшая.

Ра́дуйся, я́ко христиа́нским благоче́стием украси́лася еси́, во уче́нии преуспе́вшая.

Ра́дуйся, я́ко ма́слина благоле́пна нра́вом и благопло́дна умо́м взраще́нная.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 2

Ви́дя дарова́ния твоя́, ра́зум и красоту́ ве́лию, Феофа́ние блаже́нная, избра́ тя импера́тор на брак чист деви́цу досто́йну сы́ну своему́ Льву́, с ним же пра́ведно и свя́то на земли́ пожи́вши, пое́ши Христу́ Бо́гу: Аллилу́ия. 

Икос 2

Ра́зумом бога́та еси́, роди́телей труда́ми благоче́стия преиспещре́нна, прекра́сная же́но Феофа́ние, во дни жития́ твоего́ в пала́тах ца́рских лише́ния поне́сшая безро́потно пра́ведным житие́м имени́тая всем лю́дем. Мы же со умиле́нием ти свя́то на земли́ пожи́вшей пое́м: 

Ра́дуйся, в послуша́нии Бо́гу пребыва́ющая.

Ра́дуйся, Го́сподеви и ны́не со смиренному́дрием тружда́ющаяся.

Ра́дуйся, Христу́ с благогове́нием и тре́петом ра́дующаяся.

Ра́дуйся, во дни́ земна́го жития́ твоего́ благообра́зно ходя́щая.

Ра́дуйся, жено́ царя́, во ору́жие све́та облаче́нная.

Ра́дуйся, зна́ющим житие́ твое́ Све́том Христо́вым просвеще́ние да́рующая.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 3

Си́лою Бо́жией укрепле́нная ты, блаже́нная цари́це Феофа́ния, я́ко по ра́дости бра́чней, сама́ Десни́ца Госпо́дня утеше́ние ти дарова́ла есть, свята́я же́но, и скорбь заточе́ния безви́нного с ю́ным царе́м супру́гом твои́м благове́рным бре́менем ле́гким понесла́ еси́ безро́потно. Ве́рнии Христу́ лю́дие пою́т Ему́ о вас: Аллилу́ия. 

Икос 3

Име́яй в се́рдце свое́м любо́вь нелицеме́рну, наде́жду изве́стну и ве́ру непосты́дну Бо́гу, блаже́нная цари́це, неви́нно заточе́ние с возлю́бленным о Го́споде супру́гом твои́м претерпе́ла еси́. Три ле́та в кре́пости посто́м и моли́твою ду́шу свою́ обогаща́ла еси́, се́рдце украша́я доброде́тельми. Те́мже и ра́зум твой Све́том Христо́вым освяща́ем и просвеща́ем бы́сть. Мы же́ удивле́нные по́двигом твои́м воспева́ем тя,  Феофа́ние: 

Ра́дуйся, сло́во апо́стола о супру́жестве исполня́ющая.

Ра́дуйся, любо́вь и́стовую и пре́данность супру́гу своему́ явля́ющая.

Ра́дуйся, смире́ния о́бразе, Сами́м Христо́м возвели́ченная.

Ра́дуйся, по возгла́се пти́цы, облича́ющем царя́, с му́жем освобожде́нная.

Ра́дуйся, в черто́зех ца́рских о спасе́нии души́ попече́ние соверша́вшая.

Ра́дуйся, супру́гом, я́ко хода́таица пред Бо́гом почита́емая.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 4

Бу́ри страсте́й стороня́сь, в ца́рских черто́гах подви́жнически пожила́ еси́, блаже́нная цари́це, Феофа́ние, и те́сным путе́м в селе́ния ра́йские вошла́ еси́, иде́же воспева́еши Христу́ Бо́гу: Аллилу́ия. 

Икос 4

Слы́шала еси́, Феофа́ние, Спа́совы глаго́лы: «А́ще кто хо́чет по Мне идти́, да отве́ржется себе́, и во́зьмет крест свой, и по Мне гряде́т». Те́мже, цари́це свята́я, Христу́ после́довала еси́. Мы же, взира́я на по́двиги и труды́ твоя́, зове́м ти си́це: 

Ра́дуйся, плотски́я стра́сти свя́тостию победи́вшая.

Ра́дуйся, житие́ доброде́тельное возлюби́вшая.

Ра́дуйся, у́ды твоя́ ору́дием Пра́вды Бо́жия сотвори́вшая.

Ра́дуйся, стопы́ своя́ к за́поведям Христо́вым напра́вившая.

Ра́дуйся, род ца́рский пра́ведностию украша́ющая.

Ра́дуйся, цари́цею и подви́жницею пребыва́ющая.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 5

Боготе́чней звезде́, теку́щей к Ца́рствию Небе́сному уподо́бися житие́ твое́, Феофа́ние блаже́нная, е́же све́том ста для лю́дей придво́рных. И́хже душа́м назида́ние благо́е да́руя, науча́ла еси́ благоприя́тно пе́ти Бо́гу: Аллилу́ия. 

Икос 5

Ви́деша царь Лев, супру́г твой, тя смире́нием бога́тую, Феофа́ние свята́я, я́ко на слу́ги и рабы́ни ты взира́ла еси́, ка́ко на бра́тию и сесте́р равноче́стных ти, всех почита́я зва́нием о Го́споде. Любо́вь христиа́нская бысть посреде́ вас. Мы же о сем со умиле́нием пое́м такова́я: 

Ра́дуйся, всех о Го́споде возлюби́вшая.

Ра́дуйся, подвла́стным ти лю́дем чадолюби́вою ма́терию бы́вшая.

Ра́дуйся, боле́знующих се́рдцем вы́ну утеша́ющая.

Ра́дуйся, у́ста своя́ в чистоте́ сохрани́вшая.

Ра́дуйся, кля́твы николи́же оброни́вшая.

Ра́дуйся, всем к тебе́ взыва́ющим помога́ющая.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 6

Пропове́дница яви́лася еси́ подви́жнического жития́, блаже́нная цари́це Феофа́ние, ни в пусты́нях, ни в гора́х и в верте́пах, но в ца́рских черто́гах ди́вно свя́то и непоро́чно пожи́ла еси́, по́двигами и труда́ми прославля́я Бо́га и вопия́ Ему́: Аллилу́ия. 

Икос 6

Возсия́ в черто́гах ца́рских свет доброде́тельного и подви́жнического жития́ твоего́, о ма́ти преблаже́нная, и вся Византи́я ви́дя ко спасе́нию твори́мыя смире́нные по́двиги и труды́ твоя́ удивля́хуся. Мы же усе́рдно любо́вию тя почита́юще, че́вствуем похвала́ми си́ми: 

Ра́дуйся, о спасе́нии души́ попече́ние до́бре сотвори́вшая.

Ра́дуйся, под порфи́рою ца́рскою власяни́цу гру́бую носи́вшая.

Ра́дуйся, многотру́дное те́ло твое́ на рого́же кра́ткому сну предава́вшая.

Ра́дуйся, вме́сто ца́рския сне́ди хлеб и о́вощи вкуша́вшая.

Ра́дуйся, чте́нием Свяще́нного Писа́ния ду́шу свою́ утеша́вшая.

Ра́дуйся, су́етныя жи́зни удово́льствиями пренебрега́вшая.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 7

Хотя́ ца́рь Лев, ви́дя свя́тость жития́ твоего́, хра́м во и́мя твое́ воздви́гнути, блаже́нная Феофа́ние. Ты же, цари́це, не то́кмо не соизво́лила супру́гу своему́, но возбрани́ла де́ло сие́ ре́вностно. Тем же твоему́ смире́нию глубо́кому дивля́хуся, зове́м Бо́гу: Аллилу́ия. 

Икос 7

Но́вый нача́ созида́ти храм во и́мя твое́ благове́рный муж твой, цари́це, послу́шав сло́во твое́, не препира́ся во́ле твое́й. Рекл у́бо ца́рь Му́дрый: «А́ще Феофа́ния свята́ есть, да бу́дет па́мять ея́ в со́нме всех святы́х, во сла́ву от всех святы́х Сла́вимому Бо́гу! Ему́ же и от нас да бу́дет сла́ва во ве́ки. Ами́нь.» Храм всех святы́х именова́ся, и пра́зденством таковы́м Це́рковь Христо́ва обогати́ся. Ра́дости испо́лнишася, пое́м тебе́, Феофа́ние, похвалы́ сия́:

Ра́дуйся, в ли́ке му́дрых дев в черто́г Спа́сов прите́кшая.

Ра́дуйся, святы́м уго́дникам Госпо́дним почте́ние сугу́бое воздаю́щая.

Ра́дуйся, цари́це, Царя́ Царе́й слуга́ избра́нная.

Ра́дуйся, венце́м Сла́вы Бо́жия увенча́нная.

Ра́дуйся, со́нмом святы́х ра́достне сре́тенная.

Ра́дуйся, собо́р пра́ведных украша́ющая.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 8

Стра́нное неве́рным и похваля́емое ве́рными житие́ твое́, блаже́нная цари́це Феофа́ние, и́бо дух твой не плени́ся черто́гами ца́рскими, но в го́рняя устреми́ся, взыску́я блаже́нства небе́снаго. Мы же похваля́я по́двиги и труды́ твоя́, вопие́м Бо́гу: Аллилу́ия. 

Икос 8

Всю себе́ житию́ подви́жническому преда́вши, любо́вию к Бо́гу и бли́жним пламене́яй, цари́це сла́вная! Приле́жно се́рдце твое́ гове́нию и слу́жбам Бо́жиим бысть. Се бо во обитель святы́х апо́столов, ю́же ты возлюби́ла все́ю душе́ю, ча́сто удаля́лася еси́, моли́тву творя́ богоуго́дную. Мы же, жела́я восхвали́ти тя, пое́м такова́я: 

Ра́дуйся, сия́нием красоты́ небе́сныя озаре́нная.

Ра́дуйся, во Ца́рствии Бо́жии водворе́нная.

Ра́дуйся, Ве́чныя Сла́вы упова́нием на Христа́ Бо́га дарова́нием обогаще́нная.

Ра́дуйся, присносу́щныя ра́дости сподо́бившаяся.

Ра́дуйся, обетова́ние получи́вшая, я́ко Пра́вду соде́явшая.

Ра́дуйся, во све́тлости святы́х сла́дость Богообще́ния принима́ющая.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 9

Вся́кое естество́ а́нгельское удиви́ся житию́ твоему́, Феофа́ние блаже́нная, цари́цею по избра́нию бы́вше, по призва́нию преподо́бием возсия́ла еси́. Сего́ ра́ди в Собо́ре святы́х жен пое́ши Христу́ Бо́гу, Укрепи́вшему тя на по́двиг сей: Аллилу́ия. 

Икос 9

Вити́я многовеща́нныя не возмо́гут о смире́нии твое́м изрещи́. Недоуме́ют бо, ка́ко цари́цею бы́ша, но в Ца́рствие Небе́сное взошла́ еси́ путе́м у́зким, многотру́дным и приско́рбным, по за́поведи Христа́ Влады́ки твоего́, Феофа́ние, широ́кий путь презре́вша и отве́ргнув. Благогове́я пред о́бразом твоего́ жи́тельства вопие́м ти си́це:  

Ра́дуйся, посто́м и моли́твою ду́шу свою́ убеля́вшая.

Ра́дуйся, по́двигом твои́м пустынножи́телям поревнова́вшая.

Ра́дуйся, исполне́нием за́поведей у Бо́га оправда́ние сниска́вшая.

Ра́дуйся, моля́щихся тебе́ Ми́лостию Христо́вою осеня́ющая.

Ра́дуйся, со смире́нием на Спа́са упова́ние полага́вшая.

Ра́дуйся, воздержа́нием ве́лиим люде́й и а́нгелов удивля́ющая.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 10

Спасти́ся хотя́ от бури́ жите́йския к тебе́ прибега́ем, о ма́ти на́ша, блаже́нная цари́це Феофа́ния, я́ко к до́брей наста́внице. Ты бо в черто́зех царе́вых о пло́ти вознераде́в, постом, бдение́м и моли́твою ду́шу свою́ спасла́ еси́ и свети́льником благоче́стия лю́дем яви́лася еси́. Да с тобо́ю вопие́м Христу́: Аллилу́ия. 

Икос 10

Стена́, покров и прибе́жище была́ еси́ всем ни́щим и убо́гим, притека́ющим к тебе́, блаже́нная цари́це, хра́мам и оби́телям благотворя́, тле́нное раздава́я, да нетле́нное приобря́щеши. Тем же вопие́м ти такова́я: 

Ра́дуйся, забо́тами о бе́дных утеше́ние душе́ мно́гажды прия́вшая.

Ра́дуйся, вдо́вам и си́рым благотвори́вшая.

Ра́дуйся, хра́мам и монастыря́м благоде́ющая.

Ра́дуйся, и́ноков, я́ко бра́тий возлюби́вшая.

Ра́дуйся, наставле́ниям духо́вного отца́ при́сно внима́вшая.

Ра́дуйся, моли́твенницею о всех правосла́вных христиа́нах ста́вшая.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 11

Пе́ние немо́лчное пред Престо́лом Пресвяты́я Тро́ицы воздае́ши, блаже́нная цари́це Феофа́ния, моли́тва твоя́ Го́сподом, я́ко фимиа́м прие́млема быва́ет. Ты бо всю себе́ в же́ртву жи́ву принесла́ Творцу́ твоему́. Мы же Ди́вному во святы́х Бо́гу пое́м о тебе́: Аллилу́ия. 

Икос 11

Светоза́рное твое́ житие́, множество́м чуде́с бога́тое, я́ко луча́ми просвеща́ет сердца́ су́щих на земли́ и к ра́зуму Боже́ственному наставля́я. Та́кожде и нетле́ние моще́й твои́х ве́ру на́шу укрепля́ет и оби́лие благода́ти поуча́ет и нас ве́село взыва́ти ти: 

Ра́дуйся, я́ко звезда́ многосве́тлая, доброде́телей све́тлостию озаре́нная.

Ра́дуйся, я́ко во сла́ву непристу́пную вше́дшая.

Ра́дуйся, я́ко жизнь и́стинную и ве́чную прия́вшая.

Ра́дуйся, я́ко посто́м изнури́вши себе́, пи́щи небе́сныя насле́дницею себе́ яви́вшая.

Ра́дуйся, я́ко умертви́вши плоть твою́ боле́зньми мно́гими , жи́зни бу́дущия дости́гшая.

Ра́дуйся, я́ко совоку́пльшися служи́телем небе́ за ны моля́щаяся.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 12

Благода́ть получи́ла еси́ от подвигополо́жника Христа́, блаже́нная цари́це Феофа́ния, неду́ги душе́вныя и теле́сныя исцеля́ти и у ра́ки моще́й твои́х чудеса́ мно́гие изоби́луют и до ны́не. К ним же припа́дающе ве́рою, мо́лим тя, изба́ви нас, чту́щих святу́ю па́мять твою́, от всех зол и напа́стей, и сподо́би моли́твами твои́ми в селе́ниях ра́йских пе́ти Богу́: Аллилу́ия. 

Икос 12

Пою́ще житие́ твое́ подвига́ преиспо́лненное, и преселе́ние в Ца́рство Небе́сное сла́вяще, иде́же со святы́ми воспева́еши, Феофа́ние, всесвято́е и́мя Отца́ и Сы́на и Свята́го Ду́ха, ублажа́ем па́мять твою́, взыва́юще ти такова́я:  

Ра́дуйся, от Пастыренача́льника Христа́ неувяда́емый вене́ц сла́вы прия́вшая.

Ра́дуйся, я́ко и́мя Го́спода Иису́са в житии́ свое́м просла́вившая.

Ра́дуйся, кро́тко пожи́вши на земли́, ми́лости и бла́гости испо́лнившаяся. 

Ра́дуйся, досто́йна обита́ния в Царстве́ Христово́м сподо́бившаяся.

Ра́дуйся, слеза́ми покая́ния и умиле́ния пред Бо́гом радость ве́лию обре́тшая.

Ра́дуйся, му́драя де́во Жениху́ Христу́ све́тел свети́льник сохранивша́я.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 13

О, блаже́нная цари́це Феофа́ние, при́зри на всех нас, па́мять твою́ соверша́ющих, и умоли́ Бо́га, Его́же ты возлюби́ла еси́ всем се́рдцем твои́м и все́ю душе́ю твое́ю и всем разуме́нием твои́м, огради́ти нас ми́ром и проще́ние грехо́в дарова́ти нам. Да с тобо́ю ку́пно в собо́ре всех святы́х пое́м Ему́: Аллилу́ия. 

Сей кондак чтем трижды, затем 1-й икос и 1-й кондак.

Икос 1

А́нгелы в помо́щники себе́ призыва́ша боголюби́вый иллю́стрий Константи́н с благоче́стною супру́гою А́нною, Бо́га о дарова́нии ча́да приле́жно умоля́я, Богоро́дицу и Ма́терь Све́та о разреше́нии безпло́дия хода́тайства прося́, во хра́ме Ея́ всечестне́м в Фора́кии: «Да разреши́тся, о Госпожа́ ми́ра, безпло́дие на́ше Твои́м милосе́рдием, и да прии́мем по хода́тайству Твоему́ от Созда́теля чадоро́дие!» Ми́лости Боже́ственныя дар бы́сть дще́рь Феофа́ния блаже́нная, моли́твенница о христиа́нах правосла́вных, е́й же ра́достно пое́м такова́я: 

Ра́дуйся, пло́де моли́твы Бо́гом дарова́нный.

Ра́дуйся, я́ко роди́телей рожде́нием твои́м Бог возвесели́вый.

Ра́дуйся, я́ко в младе́нчестве крести́ти тя Госпо́дь их умудри́вый.

Ра́дуйся, я́ко отрокови́цею ко Христу́ после́довавшая.

Ра́дуйся, я́ко христиа́нским благоче́стием украси́лася еси́, во уче́нии преуспе́вшая.

Ра́дуйся, я́ко ма́слина благоле́пна нра́вом и благопло́дна умо́м взраще́нная.

Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.

Кондак 1

Избра́нней и преди́вней уго́днице Бо́жией блаже́нней цари́це Феофа́нии пе́ние похва́льное прино́сим во вселе́тней па́мяти ея́, и, я́ко иму́щей дерзнове́ние ко Го́споду, взыва́ем: испроси́ у Царя́ Ца́рствующих Христа́, да моли́твами твои́ми соприча́стницы Собо́ра всех святы́х бу́дем, умиле́нно пою́ще ти: Ра́дуйся, блаже́нная цари́це Феофа́ния, свя́то и непоро́чно на земле́ жи́ти нас подвиза́ющая.                                                                                                                                                    

МОЛИТВА СВЯТЕЙ БЛАЖЕННЕЙ ЦАРИЦЕ ФЕОФАНИИ

О, блаже́нная цари́це Феофа́ние, ма́ти христолюби́вая ве́рных в моли́твах тя призыва́ющих! Черто́г ца́рский бы́сть обита́лище твое́ на земли́, в не́мже о Го́споде превозмогла́ еси́ вся искуше́ния от лука́вого, ми́ра и пло́ти находя́щии. Научи́ на́с, свята́я же́но, да отрази́м прело́ги диа́вольския и победи́тели нахожде́ний ста́ти возмо́жем моли́твами твои́ми. 

Сохраня́яй всех па́мять твою́ чту́щих от бед, зол и боле́зней! Це́рковь Святу́ю, ю́же ты возлюби́ла еси́, от ересе́й огради́, Те́ла Христо́ва раско́ла ран испроси́ у Вседержи́теля врачева́ние, да даст Госпо́дь кре́пость лю́дем Свои́м, и ми́ром да благослови́т всех. 

Ей, Феофа́ние блаже́нная, не посрами́ упова́ния на́шего, е́же на тя о Христе́ полага́ем, да сподо́бимся с тобо́ю в со́нме всех святы́х, и́хже Собо́ра пра́зденству житие́ благоче́стное и смире́ние твое́ послужи́ло есть, сла́ву воспева́ти И́стинному Бо́гу Пресвяте́й Тро́ице Единосу́щней и Неразде́льней Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь. 

Тропарь, глас 1

Богоявленную царицу воспевающе / и житие ея преподобническое восхваляюще, / терпение же и смиренномудрие ублажающе, / любовию непрестанно взываем: / поминай и нас, блаженная Феофание, // в молитвах твоих ко Христу неусыпных.

Кондак, глас 3

Царским венцем на земли венчанная, / блаженная Феофание, / Небеснаго венца возжелала еси, / темже и плоть твою бдением же и пощением озлобляла еси, / багряницею царскою вретище власяно прикрывающи / и молитвы теплыя Богу приносящи на всяк час, / подвиги же твоя творя тайне. / Темже тя яве прослави Подвигоположник Христос Бог наш, / и ныне ти вси взываем: / радуйся, блаженная царице, // яко сподобилася еси Небеснаго Царствия.