Молитвы святителю Тихону, Патриарху Московскому и всея России чудотворцу

Дни памяти: 

• 7 февраля (или ближайшее воскресенье) — в составе Собора новомучеников и исповедников Церкви Русской

• 22 февраля (9 февраля по ст. ст.) — обретение мощей

• 7 апреля (25 марта по ст. ст.) — день преставления (смерти) святителя (1925 г.)

• 9 октября (26 сентября по ст. ст.) — день прославления в лике святых

• 18 октября (5 октября по ст. ст.)- Собор Московских святителей

• 18 ноября (5 ноября по ст. ст.) — день избрания на Патриарший престол (1917 г.)

Молитва святителю Тихону, патриарху Московскому и Всея России

О пастырю наш добрый, святый великий патриарше Тихоне, яко град горний ты явился еси, добрая дела твоя и доныне светятся пред человеки. Вемы, яко ты, предстоя Престолу Пресвятыя Троицы, велие имаши дерзновение в молитвах пред Господем. Воззри и ныне на нас грешных и недостойных чад твоих, к тебе бо яко имущему велие дерзновение пред Творцем всяческих, ныне припадаем и усердно молимся: умоли Господа, да подаст нам решимость стяжати благочестие отцев наших, егоже ты стяжал еси от юности твоея. Ты в житии своем ревностный защититель и хранитель истинныя веры был еси, помози и нам незыблему соблюсти веру православную. Тихая бо душа твоя зело преуспела в Божественном смиренномудрии, научи и нас разум наш питати не многомятежною мудростию человеческою, но смиренным познанием воли Божией. Ты пред лицем лютых врагов Христовых истиннаго Бога дерзновенно исповедал еси, молитвою своею укрепи нас, малодушных, да и мы всегда и всюду противостанем духу безбожия и льсти. Ей, угодниче Божий, не презри нас, молящихся тебе, ибо не токмо от бед и скорбей избавление просим, но силы и твердости, великодушия и любве просим, дабы переносити оныя напасти, возстающия на ны. Испроси нам неослабное терпение даже до конца жития нашего, мир с Господом и грехов отпущение. Отче святый! Укроти в стране нашей ветры неверия и смуты, да водворит Господь на земли Российстей тишину и благочестие и любовь нелицемерную. Молитвами твоими да сохранит ю от междоусобныя брани, да укрепит святую Церковь нашу Православную, да не оскудеет она истинными пастырями, добрыми делатели, право правящими слово евангельской истины. Упаси и заблуждшия овцы стада Христова. Наипаче же моли Господа сил, да возродится Русская земля святым покаянием и единым сердцем и едиными усты прославит дивнаго во святых Своих Бога в Троице славимаго Отца и Сына и Святаго Духа во веки веков.
Аминь.

Молитва иная святителю Тихону, патриарху Московскому и Всея России

О великий угодниче Божий, страстотерпче и святителю отче Тихоне, яко благоуханный цвет Российскаго луга духовнаго дивно процветый и добрый плод Христу Богу в терпении принесый, главо славнаго воинства новомучеников и исповедников Российских, ты соделался еси отцем всем православным христианом страны нашея и разсеянным по миру чадом Русския Церкве, ты еси наш хранитель и ходатай пред Господем, печальник и молитвенник за землю Русскую — Дом Пресвятыя Богородицы. С любовию припадаем к тебе и прославляюще подвиги твоя благоговейно молим тя, молися Господу нашему Иисусу Христу, яко Насадителю жизни и Победителю смерти, да не погибнет Россия, Отчизна наша, но да будет даже до конечнаго суда Божия светом православныя правды во откровение языков, да не оскудеет вера наша, да не угаснет надежда, да утвердится любы в сердцах наших. О святителю наш милостивый, Церкве Русския светило и столпе непоколебимый, покаяния мудрый проповедниче, молим тя, укроти междоусобную брань страстей наших, огради Церковь Русскую Православную от ересей и расколов, сохрани нас от тлетворных учений и суеверия, избави от лукавых человек, сохрани жизнь нашу от развращений и нестроений, врагами веры и Отечества нашего воздвизаемых, всяческих же искушений избави нас и сподоби в любви и единомыслии совершати дело Господне и воспевати со всеми верными чады Церкве Христовы славу Отцу и Сыну и Святому Духу во веки веков.
Аминь.

Тихон, патриарх Московский всея Российский (†7.04.1925г.)
Житие святителя Тихона, патриарха Московского и Всея России
Акафист святителю Тихону, патриарху Московскому и Всея России
Акафист святителю Тихону, Патриарху Московскому и всея России чудотворцу (иной)
Молитвы святителю Тихону, Патриарху Московскому и всея России чудотворцу
Тропарь святителю Тихону, патриарху Московскому и всея Руси